കാഴ്ച്ചയില് കൈയിലൊതുങ്ങുന്ന ഒരു ഇരുണ്ട ലോഹഗോളം, ആടയാഭരണങ്ങളൊന്നുമില്ല. ആപ്പിളിന് ഇതിന്റെ ഡിസൈന്റെ പേരില് ഭാവിയില് തര്ക്കമുന്നയിക്കാന് ബുദ്ധിമുട്ടാകും. ലോകത്തെ ആദ്യ 'സോഷ്യല് സ്ട്രീമിങ് മീഡിയ പ്ലെയര്' എന്ന വിശേഷത്തോടെ ഗൂഗിള് അവതരിപ്പിച്ച 'നെക്സസ് ക്യു', രൂപഘടനയിലും പ്രവര്ത്തനത്തിലും വ്യത്യസ്തതയുള്ള ഗാഡ്ജറ്റാണ്.
ക്ലൗഡില് നിങ്ങള് സൂക്ഷിച്ചിട്ടുള്ള ഇഷ്ടവിഭവങ്ങള് നേരിട്ട് നിങ്ങളുടെ ഇരുപ്പുമുറിയിലേക്ക് സ്ട്രീം ചെയ്യാനുള്ള ഉപകരണമാണിതെന്ന് ഗൂഗിള് പറയുന്നു. ജിഞ്ചര്ബ്രെഡ് മുതലുള്ള ആന്ഡ്രോയിഡ് വേര്ഷന് ഉപയോഗിക്കുന്ന ഫോണ് അല്ലെങ്കില് ടാബ്ലറ്റിനൊപ്പം വൈഫൈ കണക്ഷനും വേണമെന്ന് മാത്രം.
ഫോണിലെ അല്ലെങ്കില് ടാബ്ലറ്റിലെ 'ഗൂഗിള് പ്ലേ'(Google Play), യുട്യൂബ് ആപ്ലിക്കേഷനുകളുടെ സഹായത്തോടെ, വീട്ടിലെ വലിയ സ്പീക്കറില് ഇഷ്ടസംഗീതം ആസ്വദിക്കാനും, വലിയ സ്ക്രീനില് ഹൈഡെഫിനിഷന് സിനിമ കാണാനും നെക്സസ് ക്യു അവസരമൊരുക്കുന്നു. 'ഡൗണ്ലോഡിന്റെ പ്രശ്നം ഉദിക്കുന്നില്ല, സിങ്ക്രണൈസ് എന്ന കാത്തിരിപ്പ് വേണ്ട, കമ്പ്യൂട്ടറില് സ്ഥലംതികയാത്ത പൊല്ലാപ്പുമില്ല'-ഗൂഗിള് പറയുന്നു.
ഒരു 'സെറ്റപ്പ് ബോക്സ്' പോലെയാണ് നെക്സസ് ക്യു പ്രവര്ത്തിക്കുക. ടിവി, സ്പീക്കറുകള് മുതലായവയുമായി ഘടിപ്പിക്കാവുന്ന പോര്ട്ടുകള് മുഴുവന് പിന്ഭാഗത്താണ് നെക്സസ് ക്യുവില് ക്രമീകരിച്ചിരിക്കുന്നത്. മ്യൂസിക് കേള്ക്കുന്ന വേളയില് ക്യുവിലെ നീല പൊട്ടിന് മുന്നില് ഒന്ന് കൈവീശിയാല് മതി, മ്യൂസിക് മൂട്ടാകും. മ്യൂസിക്കിനനുസരിച്ച് ക്യുവിലെ എല്ഇഡിയുടെ നിറം കസ്റ്റമറൈസ് ചെയ്യാനും സൗകര്യമുണ്ട്.
എച്ച്ഡിഎംഐ (HDMI) കേബിള് വഴിയാണ് ടെലിവിഷനുമായി ക്യു ബന്ധിപ്പിക്കുക. അത് വളരെ ലളിതമായി ചെയ്യാന് കഴിയും. അവശേഷിക്കുന്ന ക്രമീകരണങ്ങള് മുഴുവന്,'നെക്സസ് ക്യു ആപ്ലിക്കേഷ'ന്റെ (Nexus Q app) സഹായത്തോടെ നിങ്ങളുടെ ആന്ഡ്രോയിഡ് ഉപകരണത്തിലാണ് ചെയ്യേണ്ടത്. അതും വളരെ അനായാസം കഴിയുമെന്നും, ആപ്ലിക്കേഷന് ഓണ് ചെയ്തിട്ട് അതിലുള്ള സൂചനകളനുസരിച്ച് നീങ്ങിയാല് മതിയെന്നും ക്യുവിനെ റിവ്യൂ ചെയ്ത ടെക്വിദഗ്ധര് പറയുന്നു.
ക്യുവിന്റെ ഏറ്റവും വലിയ മെച്ചം, അതിന്റെ സോഷ്യല് ഫീച്ചറാണെന്ന് വിലയിരുത്തപ്പെടുന്നു. ക്യു ഉപയോഗിച്ച് ഒരു പ്ലേലിസ്റ്റ് രൂപപ്പെടുത്തി, സുഹൃത്തുക്കളുമായി അത് പങ്കുവെയ്ക്കാന് കഴിയും. പാര്ട്ടിയില് ഏത് മ്യൂസിക് കേള്ക്കണമെന്ന് സുഹൃത്തുക്കള്ക്കും തീരുമാനിക്കാന് കഴിയും. എന്നാല്, ഇത് പ്രായോഗികമായി നടപ്പാക്കാന് ബുദ്ധിമുട്ട് ഉള്ളതായി നിരൂപകര് പറയുന്നു.
സാന് ഫ്രാന്സിസ്കോയില് ഗൂഗിളിന്റെ വാര്ഷിക ഡെവലപ്പര് കോണ്ഫറന്സിലാണ് കഴിഞ്ഞ ദിവസം പുതിയ മീഡിയ പ്ലെയര് അവതരിപ്പിക്കപ്പെട്ടത്. അമേരിക്കയില് 299 ഡോളര് വില വരുന്ന നെക്സസ് ക്യു ജൂലായ് പകുതിയോടെ ഉപഭോക്താക്കളുടെ പക്കലെത്തും.
No comments:
Post a Comment